ప్రచురణలు

పరిషత్తు ప్రధానాశయాలలో గ్రంథ ప్రచురణ ఒకటి. ఇప్పటివరకు 160 ఉత్తమ గ్రంథాలు ప్రచురించింది. ఇవి పండితులకు, పరిశోధకులకు, విద్యార్థులకు, నూతన అక్షరాస్యులకు, పిల్లలకు ఇలా అన్ని వర్గాల వారికి ఎంతో ఉపకరిస్తున్నాయి. పరిషత్తు ప్రచురణలలో అత్యుత్తమ ప్రమాణాలు సంతరించుకున్న గ్రంథాలెన్నో ఉన్నాయి. ఉదాహరణకు ఆంధ్రుల సాంఘిక చరిత్ర. దీని రచయిత శ్రీ సురవరం ప్రతాపరెడ్డి. తెలుగులో తొలి సాహిత్య అకాడమీ పురస్కారం అందుకున్న మహనీయుడు. పరిషత్తు గ్రంథాలు కొన్ని విశ్వవిద్యాలయాలలో పాఠ్యాంశాలుగా ఉన్నాయి. ప్రపంచ రాజ్య సర్వస్వము అనే గ్రంథం భారతీయ భాషలలో ఈ అంశంపై వెలువడిన మొట్టమొదటి గ్రంథం. జాతీయ, అంతర్జాతీయ విషయాలు, వివరాలపట్ల ఆసక్తి ఉన్న వారికి ఈ గ్రంథం కరదీపిక వంటిది.

డా. దివాకర్ల వేంకటావధాని — ఆంధ్రవాఙ్మయ చరిత్ర, డా. నేలటూరి వెంకట రమణయ్య — ఆంధ్రుల చరిత్ర, డా. బూర్గుల రామకృష్ణారావు — సారస్వత వ్యాస ముక్తావళి, శ్రీ రాళ్ళపల్లి అనంతకృష్ణశర్మ — శాలివాహన గాథాసప్తశతి సారం, శ్రీ ఆదిరాజు వీరభద్రరావు — జీవిత చరిత్రలు, డా. దేవులపల్లి రామానుజరావు — సారస్వత మంజూష, శ్రీ సన్నిధానం సూర్యనారాయణ శాస్త్రి — కావ్యాలంకార సంగ్రహము వంటి ఎన్నో అపూర్వ కృతులను పరిషత్తు పాఠకలోకానికి అందించింది. పరిషత్తు వెలువరించిన కొన్ని ముఖ్య గ్రంథాలను దిగువ చూడవచ్చు.