విద్యా సంస్థలు

తెలుగు వికాసకృషిలో భాగంగా పరిషత్తు 10-8-1968 తేదీన ప్రాచ్య కళాశాలను ప్రారంభించింది. ఇది ఉస్మానియా విశ్వవిద్యాలయానికి అనుబంధమై, ఆ విశ్వవిద్యాలయం గుర్తింపు పొందిన కళాశాల. ఈ కళాశాల సిబ్బంది జీతాలను రాష్ట్ర ప్రభుత్వం చెల్లిస్తుంది. ఈ విధంగా ఇది ఎయిడెడ్ కళాశాల. ఇందులో భాషాభ్యాసం చేసిన తగిన ఉద్యోగాలు పొందేందుకు అవకాశాలున్నాయి. ఈ కళాశాలలో మూడు కోర్సులున్నాయి. ఇవి 1. పి.డి.సి. (ప్రి-డిగ్రీ కోర్సు) — 2 సంవత్సరాలు 2. బి.ఎ. (ఎల్) — 3 సంవత్సరాలు 3. ఎం.ఎ. (ఎల్) — 2 సంవత్సరాలు. పరిషత్తు నిర్వహించే విశారద ఉత్తరభాగం పరీక్ష ఉత్తీర్ణులైన అభ్యర్థులు ఈ ప్రాచ్య కళాశాల పి.డి.సి.లో చేరేందుకు అర్హులు.

కళాశాలలో ప్రతి సంవత్సరం సుమారు 300 మంది అభ్యర్థులు ప్రవేశం పొందుతారు. కళాశాల ఉన్నత ప్రమాణాలు నెలకొల్పింది. చాలామంది ఎం.ఎ. (ఎల్) విద్యార్థులు ఉస్మానియా విశ్వవిద్యాలయం పరీక్షలలో ఎక్కువ మార్కులు సాధించి స్వర్ణపతకాలు పొందినారు. ఈ కళాశాలవారిగా నెలవంక అనే సంచికను వెలువరించారు.